Sc5 Berrikuntza eta moldakortasuna abiapuntu

SC5a Sunsundeguiren autokar moldakorrena eta erabilera anitzekoena da.

Aldiriko eta distantzia ertaineko zerbitzuetarako sortua, eskola edo enpresa garraiorako, SC7a baino zertxobait baxuagoa da, baina altuera murrizketa horrek apenas kentzen dio espazioa zamategiari; hori dela eta, moldakortasun eta multifuntzionaltasun handiko modeloa da, bidaia luzeak egiteko gai ere badena.

SC5a SC7aren diseinuaren oinordekoa da; haren lerroen diseinuari eutsita, estilo koordinatua sortzen du, gure modelo guztiei berezkoa zaiena. Sendoa eta dotorea da aldi berean, eta irudi dinamikoa eta arina dauka. Atzerako ispiluek areagotu egiten dute irudi hori, etenik gabe hedatzen baitira ibilgailuaren profil osoan; horrez gainera, talken aurkako sistema bat dute, eta horri esker ispiluak tolestu egiten dira kolpe arin bat izanez gero. Gainera, ikuspen onena eskaintzen diote gidariari, baita biratzeko erraztasun handia ere.

Aurrealdeko estetika optikool tratamendu antitermikodun beira panoramiko handiak eta altzairu herdoilgaitzezko zerrenda dotoreek baldintzatzen dute, baita aurreko argiek ere, zeinak Sunsundeguiren nortasun eta fisionomia bereizgarriak ematen dizkioten modeloari. Eguneko argia eta argi keinukaria LED motakoak dira, eta errepide-argia, laino-argia eta gurutzatze-argia, berriz, halogenoak, baina horietan ere LED sistema ipintzeko aukera dago.

Atzeko argiei dagokienez, ibilgailua serietik dator LED argiekin, eta, SC7 modeloaren antzera, aurreko argien forma bera dute, ibilgailuaren estetika bateratzeko. Atzeko argiak nahiz aurreko optikak SC7arenekin alda daitezke.

Atzealdearen diseinua Sunsundeguiren ate bereizgarriak osatzen du, zeinak ahalbidetzen duen aireztapen ezin hobea gure modeloen geometria pertsonalarekin. Barnealde moderno eta funtzionalak zabaltasun handia eskaintzen du, gangaren formari eta arkuaren handitasunari esker. Bai ibilgailurako sarrerak, bai berritutako aginte-panelak estetika abangoardistagoa dute orain, lerro luze eta arinagoekin, eta espazio handiagoa dago gidariaren ondoko eserlekuarentzat.

SC5 modeloak teknologia berriena dauka, segurtasunari dagokionez. Karrozeriak iraulien aurkako araudi zorrotzena betetzen du (66.02 Araudia), eta kolpeak xurgatzeko egitura sendotua du aurrealdean, hobeto babesten duena gidariaren eta haren ondoan doanaren eremua; barnealdeko babesek deformazio ahalmen handia dute, talka eginez gero bidaiariak hobeto babesteko, eta aurrealdean nahiz aurreko kolpe-leungailuan automatikoki balaztatzeko eta errailez aldatzeko sistemak instala daitezke.

Harrapatuta geratzea ekiditeko hainbat sistema ditu, bai ateetan, bai alboetako ataketan, eta bidaiarien segurtasunerako telebista zirkuitu itxia ere jar dakioke.

Aukerakoa da, halaber, suteak automatikoki itzaltzeko sistema ezartzea motorraren konpartimentuan, eta bestelako estra batzuk ere eskaintzen ditu, hala nola lapurreten aurkako alarma, aparkatzeko sentsoreak edo Telemat sistema.

Gure enpresarentzat, lehentasunezko helburua da erosotasunean eta segurtasunean ez ezik, errentagarritasun irizpideetan ere bezeroen premietara egokituko den autokar bat sortzea. Erregaiak gastu handia dakarrela jakitun, SC5a SC7a baino 20 cm baxuagoa da; horren ondorioz, aerodinamika oso optimizatua dago eta pisua arindu egiten da, eta, hortaz, nabarmenki murrizten da kontsumoa. Oso modelo industrializatua denez, SC5a erraz muntatu eta desmuntatzen da, eta haren instalazioak oso irisgarriak direnez, denbora gutxiago behar da mantentze lanak egiteko.

Oso erraz garbitzen da, eta oso eskura ditu aurreko zein atzeko argiak, ordezko gurpila eta atzeko atea. SC5ak ate elektrikoa duenez, sistema eraginkorragoa lortzen da, errazagoa baita haren egoera operatiboaren diagnostikoa egitea eta akats posibleak antzematea. Hala, minimizatu egiten da jarioen arazoa, karrozeriarako presiopeko airearen zirkuitua maletategia abiarazteko eta beste funtzio txikiren baterako bakarrik erabiltzen baita.

Ibilgailu honetan eserleku kopuru handiena jar daiteke, hegala ezartzeko aukera ematen duelako, eta, konfigurazio estandarra aldiriko zerbitzuetarako autobus batentzat pentsatuta badago ere, eskaintzen dituen aukerako elementu ugariei esker erosotasun maila handiko ibilgailu bilaka daiteke.

Erregai depositu gehigarriak onartzen ditu, eta horrek nabarmenki handitu dezake ibilgailuaren autonomia.

Sunsundeguin badakigu garrantzitsua dela gidatzeko eremu eroso, zabal eta ergonomikoa sortzea. Horretarako, SC5ak altueran nahiz sakoneran doitu daitekeen eserleku bat darama, eta, horrez gainera, kontrol guztiak eskuragarri jartzen ditu, ia denak gidariaren ezkerrean kokatuta, errazago maneiatu ditzan.

Aginte-panelak 7 hazbeteko pantaila bat du, zenbait funtzio biltzen dituena, hala nola aire girotua, aurre-berogailua eta lurrunaren kontrakoa kontrolatzeko aukera eta kamera nahiz unitate elektroniko guztietako irteera-sarrerak ikustekoa, horien mantentze lanak eta diagnostikoak egin ahal izateko. SC5a ibilgailu benetan multiplexatua da.

Ispiluen kokapen estrategikoari esker, gidariak ez du bere jarrera behartu behar, eta ikuspen handiagoa du. Horrez gainera, ibilgailuak ikuspegia eragozten ez duen pieza bakarreko pertsiana motorizatua du haizetakoan, eta zerrenda opakua du haizetakoaren goialdean, itsualdiak ekiditeko.

Serieko Fresnel leiarrak, aurreko atean ipiniak, gidariaren ikuseremua handitzen du ibilgailuaren eskuinaldean, eta errailez aldatzeko maniobra seguruagoak egitea ahalbidetzen dio, baita bidegurutze eta biribilguneetan ikuspen handiagoa edukitzea ere.

SC5ak paregabeko bidaia esperientzia eskaintzen dio bidaiariari. Barnealdea zabala eta oso argitsua da, erosoa izan dadin, eta egitura sendoa duenez, ez dago ez zaratarik, ez bibrazio desatseginik, eta ibilgailuaren joana atsegina eta leuna da.

Erabiltzaileen erosotasunari dagokionez, LED teknologiadun irakurketa argiak eta aire irteera indibidualizatuak dauzkate, baita USB ataketara eta 220 volteko entxufeetara konektatzeko aukera ere.

SC5ak serieko ekipamendua dakar bidaiarien entretenimendurako: irratia, audioa eta bideoa erreproduzitzeko USB ataka, esku libreko gailua, anplifikadore digitala eta funtzio anitzeko pantaila integratua. CD eta DVD irakurgailuak txertatzeko aukera ere badago. Ibilgailu bakoitzak 22 hazbeteko monitore bat eta 19 hazbeteko beste bat dauzka, eta aukera dago hirugarren bat ere jartzeko, 15 hazbeteko monitore motorizatu bat, hain zuzen ere. WIFIaren aurreinstalazioak bidaian Interneterako konexioa eskaintzeko aukera ematen du.

Klimatizazioari dagokionez, modelo honetan e-kontrol sistema munta daiteke, aukera ematen duena bidaiarien eremua eta gidariarena bereizita girotzeko. Horrez gainera, aire irteeren kokapen bereziari eta horien barne kanalizazioari esker, “sabai hotz” efektua sortzen da, zeinak bidaiarientzat tenperatura egokia eta egonkorra mantentzen duen aire korronte bat sortzen duen, konbekzio bidez.

SC5ak komuna ere eraman dezake (bai eserlekuen maila berean, bai eskaileretan), eta ibilgailuaren konfigurazio desberdinetara egokitu daiteke.

Mugikortasun urriko pertsonen irisgarritasunari dagokionez, SC5ak plataforma jasotzaileen bi konfigurazio mota ahalbidetzen ditu: bata zamategian kokatua eta bestea atzeko ardatzaren atzean kokatua; azken aukera horrek gordelekurako espazioa maximizatzeko aukera ematen du.

SC7 modeloarekin gertatzen den moduan, SC5ak ere aldaketa ugari onartzen ditu, gure bezeroek beren enpresa helburuak erabat aseko dituen ibilgailu bat lortzeko izan ditzaketen premia zehatzetara moldatzearren. Hori dela eta, Sunsundeguik era guztietako esku hartze bereziak ahalbidetzen ditu instalazioei dagokienez (audioa, SAE, CCTV, LTD entretenimendua…) eta beste hainbat alderdiri dagokienez (bidaiarien antolamendua, mahaiak, eserleku bereziak, sukaldea, kafetegia, vending makinak eta hozkailua). Luzera bereziko ibilgailuak egiten ditugu, baita fabrikazio sorta murriztuak ere, eta bestelako ekipamenduak ere eskaintzen ditugu, hala nola bizikletak eramatekoak, bizirik dauden animaliak garraiatzeko sistemak, xurgagailua eta GPSa. Ildo horretan, SC5a 10 metroko luzerarekin fabrika daitekeen modelo bakarra da. Tamaina horretako ibilgailuek gero eta eskari handiagoa dute merkatuan, taldeko garraiorako premia oso espezifikoetara moldatu baitaitezke.