Sc7 Luxuzko egoera errepidean

Sunsundeguiren SC7 autokarra distantzia luze eta ertainak egiteko diseinatuta dago, eta merkatuan erreferentzia bilakatu da, bere estetikari eta teknologiari esker.

Diseinu abangoardista, sendotasuna eta segurtasuna uztartzen ditu. Modelo honetan, diseinuaren fintasuna bultzatzen da ibilgailu osoan. Atzealdeak eta aurrealdeak logika berari erantzuten diote: euren estetika batu, eta osotasun harmoniko eta koherentea sortzen dute.

SC7ak diseinu zainduari zor dio bere nortasuna. Diseinu horri esker, ibilgailu estilizatu eta sendoa sortu da, indartsua eta dotorea, aldi berean. Autokar handien diseinuari lotutako tradizio eta esperientzia luzearen oinordeko, SC7a modelo bakarra da merkatuan bi fisionomia posible eskaintzen dituena atzerako ispiluen arabera. Ispilu simetrikoak autokarraren goiko aldean kokatuta daude, eta haren profilaren lerro jarraituarekin bat egiten dute. Atzerako ispilu asimetrikoak (aukerakoak) beren diseinu esklusiboagatik nabarmentzen dira, eta gidariari aukera ematen diote bista jaso gabe atzera begiratzeko; horrez gainera, eguraldi txarrarekin maniobrak egiteko erraztasuna eta ikuspen handia eskaintzen dizkiote. Argi bihalogeno estandarrek ematen diote itxura bereizgarria ibilgailuari, eta horien ordez bi-led argiak jar daitezke, prestazio eta argitasun handiagokoak. Bestalde, atzeko argiek aurrekoen diseinu bera dute, ibilgailuaren nortasuna bateratu, koherentzia estetikoa mantendu eta osotasun berdingabea eraikitzeko. Aurreko beira panoramikoak ikuspen handia eskaintzen du eserleku guztietatik, eta optikool tratamendu antitermikoa dauka; alboetako beirak bikoitzak dira, eta tindatuak edo estra-tindatuak izan daitezke. Altzairu herdoilgaitzezko hiru zerrenden dotoreziak ematen dio azken ukitua aurrealdearen estetikari. Era berean, diseinuak soluzio bikaina ematen dio atzeko ateari; atearen geometria sofistikatuak aireztapen ezin hobea ahalbidetzen du, eta, horrez gainera, markaren ezaugarri estetiko bereizgarrienetako bat da.

Sunsundeguik etengabeko ahalegina egiten du berrikuntzan eta teknologian, segurtasuna lortu nahian. Ildo horretan, SC7 karrozeriak iraulien aurkako araudi zorrotzena betetzen du (66.02 Araudia). Aurrealdeko egitura sendotua kolpeak xurgatzeko prestatuta dago, eta segurtasun handiagoa eskaintzen dio gidariaren eserlekua eta haren ondoko eserlekua kokatuta dauden guneari. Barne babesek deformazio ahalmen handiagoa dute, talka eginez gero bidaiariak babes handiagoa izan dezaten. Sunsundeguik gidatzen laguntzeko sistemei lotutako azken teknologia txertatzen du; ibilgailua nahigabe bidetik ateratzen ari bada, gidariak abisu akustikoa jasotzen du, edo haren eserlekua dardarka hasten da, eta gutxieneko distantzia ez uzteagatik aurreko ibilgailuarekin talka egiteko arriskuaren berri emateko sistema ezarrita dago beti. Aukerakoa da motorraren konpartimentuan suteen aurkako sistema instalatzea. Horrez gainera, ibilgailuak zenbait estra izan ditzake, hala nola lapurreten aurkako alarma, aparkatzeko sentsoreak eta Telemat sistema.

Sunsundeguin badakigu SC7ak errentagarria izan behar duela gure bezeroentzat; hori dela eta, aintzat hartu dugu kontsumoa murrizteko premia, eta, horretarako, pisua arindu, eta aerodinamika optimizatu dugu. Ibilgailuak oso eskura ditu piezak eta instalazioak, eta horrek nabarmenki murrizten du tailerreko denbora konponketetan. Era berean, aurreko zein atzeko argiak eskura daude, mantentze lanetarako, baita ordezko gurpila eta atzeko atea ere, eta barnealdea erraz garbitzen da. Sendoa denez, oso ibilgailu fidagarria da, eta, horrek areagotu egiten du etorkizunean izan dezakeen errentagarritasuna, balio handia izaten baitu bigarren eskuko merkatuan. Zamategi handia du, eta gauzak gordetzeko espazioa ondo aprobetxatzeko hainbat sistema eskaintzen ditu, hala nola gurpil-etxeetako kutxak, zeinak baitira aukerakoak.

Jakitun gara gidaria oinarrizko elementua dela ibilgailuaren maneiuan eta haren erosotasunak baldintzatuko duela, azken batean, bidaiarien segurtasuna; horrexegatik, SC7ak gidatzeko espazio erosoa du, altueran eta sakoneran doitu daitekeen eserlekuduna, eta oso ergonomikoa denez, kontrolen erabilera errazten du. Klimatizazio sistemak aire girotuko irteera gehigarriak ditu, baita lurrunaren kontrako irteerak ere; horiek aire berokoak izan ohi dira, baina aire hotzekoak muntatzeko aukera ere badago; hortaz, gidariak berak nahi duen tenperatura jar dezake bere espazioan. SC7ak ikuspen handia eskaintzen du, eta toki askotan koka daitezkeen hainbat kamera dituenez, gidariak ibilgailuaren alde guztiak ikus ditzake, bai kanpokoak, bai barnekoak. Atzerako martxarako kameraz gain (estandarra), beste kamera batzuk ere instala daitezke, hala nola paisaia ikuspegiaren kamera, atzeko eskaileretako kamera, zamategiko kamera eta baita “Magic eye” sistema ere, ibilgailuaren erabateko ikuspegi periferikoa ahalbidetzen duena. Aukerakoa da, halaber, Fresnel leiarra erabiltzea. Aurreko atean kokatuta, oso erabilgarria da, nabarmenki handitzen baitu kanpoko ikuseremua, errail aldaketa seguruagoak egin ahal izateko. Horrez gainera, gidariak mikrofono tolesgarri bat dauka, eserlekuan bertan munta daitekeena (aukerakoa), baita kanpoko argitik babesteko bi pertsiana motorizatu eta objektuak gordetzeko hainbat espazio ere.

SC7ak bidaia esperientzia berdingabea eskaintzen dio bidaiariari; izan ere, egitura sendoari esker, bibrazioak ezabatzen ditu, eta bidaiariak leunki eta zaratarik gabe bidaiatzeko aukera dauka. Erabiltzaileen erosotasunari dagokionez, led teknologiadun irakurketa argiak eta aire irteera indibidualizatuak dauzkate maleta-apalean, baita USB ataketarako eta 220 volteko entxufeetarako konexio indibidualak ere. Horrez gainera, ibilgailuak fabrikatzaile nagusiek hornitutako eserleku erosoak dauzka, baita bidaiarien eremua gidariaren eremutik bereizita girotzen duen klimatizazio sistema ere, bidaiariek tenperatura ezin hobea izan dezaten bidaia ahaztezina egiteko. Barnealdean bi metrotik gorako altuera duenez, bidaiariak erosotasunez mugi daitezke ibilgailu barruan. Serieko entretenimendu ekipamendua dakar: irratia, audioa eta bideoa erreproduzitzeko USB ataka, DVD gehigarria, esku libreko gailua, anplifikadore digitala eta funtzio anitzeko pantaila integratua. Horiei guztiei esker, bidaiarien entretenimendua bermatuta dago, konfigurazio desberdineko hiru monitore baitituzte. Oro har, 22 hazbeteko monitore bat izaten da aurrealdean, 19 hazbeteko beste bat erdialdean, eta atzean 15 hazbeteko beste bat, aukerakoa, tolesgarria eta motorizatua. Eserleku bakoitzak bere pantaila ere izan dezake. WIFIaren aurreinstalazioa seriekoa du, eta instalazioa ere egin daiteke, bezeroak hala eskatuz gero; horrek bidaian zehar Interneterako konexioa ahalbidetzen du. Erosotasuna osatzeko, komuna ere jar dakioke ibilgailuari. Hiru komun mota jar daitezke erdialdeko eskaileretan (komun horiek ez dute eserlekurik kentzen), eta atzealdean, berriz, modelo bakarra jar daiteke, eserlekuen altuera berean. SC7a egokituta dago mugikortasun urria duten pertsonentzat: MUP atea du, eta hiru motatako plataforma jasotzaileak, ibilgailuaren konfigurazio desberdinetara egokitzen direnak.

Bezeroekin harreman hurbilekoa eta pertsonala dugunez, haien premia zehatzak ezagutzen ditugu, eta badakigu une bakoitzean zer eskatzen duten autokar bat haien enpresa helburuetara egokitu dadin. Hori dela eta, Sunsundeguik era guztietako esku hartze bereziak ahalbidetzen eta egiten ditu instalazioei dagokienez (audioa, SAE, CCTV, LTD entretenimendua on demand…) eta beste hainbat alderdiri dagokienez (bidaiarien antolamendua, mahaiak, eserleku bereziak, sukaldea, kafetegia, vending makinak, hozkailua eta led bidezko metakrilatozko babesgarri argidunak). Luzera bereziko ibilgailuak egiten ditugu, baita fabrikazio sorta murriztuak ere, eta bestelako ekipamenduak ere eskaintzen ditugu, hala nola bizikletak eramatekoak, bizirik dauden animaliak garraiatzeko sistemak, xurgagailua eta GPSa.